Saturday, September 09, 2006

يا فرحة نوال سعداوي عرفت تزعزع عقول البنات

في الفترة الاخيرة اتفاجئت بسلسله من المقالات اللي فكرتني بكتب نوال سعداوي واقبال بركة
نفس الكلام نفس الاسلوب نفس الجمل نفس التعبيرات
انا بردو شامم ريحة وحشه
اللي دايقني بجد والله ان بعض البنات اللي كنت فاكر ان فكرهم ثابت ..كاتبين في الموضوع ده
ياه لغاية دلوقتي البنات لسه مش فاهمين اللعبة لسه مش فاهمين انهم اول مدخل
لغاية دلوقتي بيكتبوا بالفاظ مش موجودة في ثقافتنا العربية
الفاظ ادخلها بعض المدلسين والعلمانيين والملاحده؟
انا بقترح على كل بنت عارفه حقوقها وواجباتها ومش حاسة بالموضوع ده انها تناقشهم لاني بجد ناقشت كتير
ومش هناقش الكل يعني
اظن لو بنت ممكن تقنع اكتر من بنت ان اسلوب التفكير ده هدام ....هدام جدا
ونهايتة سلبيه نفسيا واجتماعيا واهم حاجه دينيا
يا جماعه ازاي بتتكلموا عن المساواة
I ده كل الانبياء رجالة وهنا انا مش بقول مدام كده يبقى الراجل احسن انا بقول ان الراجل ليه مهام والست ليها مهام تانيه خاالص هو الليل ممكن بتساوى بالنهار؟ على راي الشيخ الشعراوي الله يرحمه
طبعا هكون وحش وكخه
بس انا مكتبتش الكلام ده الا لاني خايف عليكم بجد
وعارف التفكير ده بيوصل لايه

35 Comments:

At 7:33 AM, Blogger shaimaa said...

ممكن يا كابتن تقلي ايه اللي انت شايفه هدام في تفكيرنا علشان نحاول نبنيه

 
At 7:57 AM, Blogger Bent Masreya said...

فرحة نوال السعداوى بإيه بس؟

يعنى يا عم عبدالفتاح كل ما واحدة تفتح بقها على طول تقولوا نوال السعداوى واقبال بركة؟؟
انت مثلا بتقول كده عشان نسكت ومانتكلمش؟؟

سيبك من الالفاظ ومن الطريقة خلينا نتكلم عن الواقع والافكار اللى اتعرضت

انت لم تناقش اى شكوى كتبتها اى بنت فى مدونتها

مدلسين ايه وعلمانيين ايه وملاحده ايه.. اقرا كويس كل اللى البنات كتبته،

اقراه كويس
واعقله
وشوفه بيحصل وللا لا
وشوف ترضاه وللا لا
بعيد عن سكة الهجوم المتسرع ده

الله يرحمه الشيخ الشعراوى لو كان موجود كان قرالنا وفكر معانا. .مش هاجمنا كده واطلق تهم متسرعة

 
At 8:16 AM, Blogger أحمد said...

This comment has been removed by a blog administrator.

 
At 9:14 AM, Blogger Bent Masreya said...

ماشى يا عم احمد
ميرسى اوى على الكلمتين الجامدين دول
بس انا ماستشهدتش بالشعراوى
عبدالفتاح هو اللى جاب سيرته
وانا احسب ان الشعرواى لو -لو لو لو لو - كان موجود كان على الاقل استمع قبل ما يتكلم

سواء انت مختلف مع الشعراوى او لا.. فدا مش معناه انك تحكم على رأيى بالفساد، او انى بفسد مش عارف ايه

وبعدين الشعرواى يتاخد منه ويترد عليه مكنش الرسول -ص- يعنى

 
At 9:16 AM, Blogger Epitaph said...

هدام

طب اعقلها انتي و حلها

حلها لما واحدة متحجبة و لا محتشمة..و ماتشتغلش و لا تروح سينما و لا تتأخر للساعة عشرة ..عشان هي بنت
مع انها محافظة علي نفسها

؟؟

متقولي كدة بطريقة بناءة
ازاي نحل مشكلة الزوج و الاب و الاخ
اللي مكفرين حياة البنت و مربينها ع الخوف؟

امسك كدة مشكلة واحدة بسيطة من اللي عرضتها البنات.. و جرب تفندها
عشان نوصل لحل

جرب و لينا حوار اخر

 
At 9:39 AM, Blogger arabesque said...

لغاية دلوقتي بيكتبوا بالفاظ مش موجودة في ثقافتنا العربية


إيه هي بقى الألفاظ المش موجودة في ثقافتنا العربية؟
المساواة مثلا؟؟
طيب و إيه رأيك في المعنى ده "لا فضل لعربي على أعجمي إلا بالتقوى"ا
الحرية؟؟
لقد خلقتنا أمهاتنا أحرارا

هو ليه كل ما بنت تتكلم تبقى موجهة و مضحوك عليها و مش عارفة مصلحتها؟ انت قريت البنات كاتبة ايه؟
قريت عن الخطأ الذكوري و الأنثوي عند فريدة؟
إزاي حتى شرع ربنا بنقسمه رجالي و ستاتي؟
ادخل اقرا هناك و بعدين نتكلم
http://morning-cafe.blogspot.com/2006/09/blog-post_09.html

 
At 12:51 PM, Blogger bluerose said...

http://bluerose.egyblogs.com/?p=73
لم لكتب كلمة مساواة ولا كلمة ذكوري اللي مزعلاك
عايزة افهم بقى
الوضع اللي اتكلمت عليه دا , ايه الصح فيه عشان يتقال اني مضحوك علي لما اعترض عليه؟؟
مستنية مناقشة عقلانية على كلامي , مش كلام مرسل

 
At 3:45 PM, Blogger Dr. Tantawy said...

متفق معك في المضمون لكني مختلف في المعنى يا عم عبدالله

يعني انا شايف ان الاضطهاد و مشاكل الفتاه موجوده و لازم تتحل .. لكن الخطير في الموضوع فكره التكتلات دي .. هتبقى فعلا مشكله كبيره لو مخدناش بالنا

انا هفكر في تدوينه مناسبه و اكتبها انشاء الله

 
At 3:52 PM, Blogger LAMIA MAHMOUD said...

وهو احنا كده بردة المفروض نخاف ونكش بقى ونسكت عشان سمعتنا وعشان ما يتقالش تفكيرنا مش ثابت .. محدش قاللك حنمشي عرايا ولا حنروح نبيت في الصحرا مع انها مش مشكلة كبيرة .. بس ممكن اقولك حاجة هما كل الانبيا الرجالة اللي انت بتتكلم عليهم كانوا بيغلطوا غلطاتكم وبيسهروا بره البيت للصبح ويمشي مع دي ودي ويجرح دي ودي استغفر الله .. ولا هو انتوا مش لاقيين حاجة تقولوها ولما يا سيدي يبقى الراجل راجل صح ابقوا اطلبوا مننا نسكت ولا مفهوم الراجل عندكوا شخط وزعيق وكلمة تمشي وبس .. وبقية المفهوم ملغي .. واقرا الفاتحة على روح الشعراوي الهي يخليك

 
At 4:08 PM, Blogger farida said...

الأول السلام عليكم

انت لفيت لفه على المدونات لقيت " شوية بنات " بيتكلموا عن حقوق المرأه أو المساواه أو التفرقه

و من غير ما تدقق في الكلام
قعدت و كتبت

طيب يا سيدي براحتك

بس انت تقول الكلام ده لو كنت لقيتنا بنقول عاوزين نسهر برا
عاوزين نمارس الجنس بحريه
عاوزين نتساوى بالرجل في الميراث

يا سيدي عمرنا ما حنقول كده
لأن المساواه مش اني أكتب إسم أمي في البطاقه

المساواه
إني أتقي فيك الله و تتقي في الله
إنك تنفذ ما قاله الله في كتابه العزيز
و أنفذه انا الأخرى

بص يا عبد الله
أنا متزوجه
و أقدر أقول بدون غرور إني متدينه بالعباده و المعامله .. و أهم شيء المعامله
و أنا مؤمنه إن الرجال قوامون على النساء
و مبسوطه بالقوامه دي
لأن معناها إني مسئوله من الرجل
و إني متبهدلش
و إني أتعز طول عمري

أنا والدي رجل متدين و الحمد لله
و أنا اتعاملت عمري كله إني حاجه غاليه جدا و لغاية اللحظه اللي بكلمك فيها ما تبهدلتش


و هي دي المرأه في الاسلام ..لكن في تفرقه
لكن برضه في ظلم
الظلم الكامن في البعد عن الله

إنت لما بتخاف على بنتك و تحميها
فأنت رجل مسلم غيور

لكن لما تمنعها من التعليم
أو تجبرها على الإستمرار في زواج لمجرد ألا تحمل لقب مطلقه
أو عندما تحرم أختك من ميراثها من أبيها

أو عندما تضرب زوجتك
أو تأخذ مالها

و عندما تزني
و عندما تخون
و عندما تتزوج عليها دون علمها
و عندما تهجرها أو تقاطعها دون عصي منها أو نشوز

عندما لا تحسن معاشرتها

ستقول لي تتطلق و تتركني

إذا من قال أنها يجب أن تحاسب أمام المجتمع لكونها مطلقه


هو ده اللي احنا بنتكلم فيه

كلنا عارفين الغلط

بس برضه بنحاكم الست على ذنب مش ذنبها

و كلنا دي رجاله و ستات
أقعد إسمع الستات بيتكلموا إزاي عن المطلقه مثلا
و هم نفس الستات اللي بيدوروا على عروسه لقطه للمطلق

الموضوع قلة دين عند الجميع

عارف الإسلام ظاهر للغرب إزاي؟؟
رجل لا يهتم سوى بشهواته و إمرأه جاريه مكبوته

ده لأننا أخذنا جزء من الشرع و سيبنا جزء

أخذنا الرجال قوامون على النساء
و سيبنا
و عاشروهن بمعروف أو سرحوهن بإحسان

أخذنا لو أمرت المرأه أن تسجد لأحد بعد الله لأمرتها أن تسجد لزوجها
و سيبنا
" رفقا بالقوارير"

دينا كرم الست في كل شيء
حتى الجنس
المباديء اللي بيعلموها في الخارج موجوده في ديننا منذ قرون

لكن إحنا طبقنا الدين ده غلط
لا دين و لا إنسانيه

إحنا عاوزين مجتمع أحسن
علشان تلاقي بنت كويسه تتجوزها
و تلاقي بنتي رجل يصونها و يتقي الله فيها

و خلي اللي يفرح يفرح
إنت زعلان ليه

 
At 5:10 PM, Blogger nada said...

الانبياء كلهم رجاله ماشي بس ياريت الرجاله يعاملوا الستات زي ما كان الانبياء بيعاملوهم

 
At 5:59 PM, Blogger رانية said...

يا أخ عبد الله ربما تسرعت قليلا فى الحكم علينا من منطلق خوفك علينا كما ذكرت

و لكننا لا ندعو إلى السفور و لا إلى التحرر من الأحكام الشرعية و لكننا ندعو للتحرر من التقاليد و العادات غير السليمة و التى لا تستند على أى سند لا فى الكتاب ولا السنة بل على العكس تماما تخالفهما

و لو حاولت قراءة المزيد من مواضيع كلنا ليلى لوجدت الكثيرات منا تستند على آيات قرآنيةو أحاديث نبوية على سبيل المثال و ليس السرد مدونة حلمhttp://tayarawara2.blogspot.com/
و مدونتى

و إن كنت احييى فيك روح الإخوة فى الله التى تحملها لنا إلا إننى أعتب عليك فى التسرع و عدم التروى فى الحكم على أخواتك فى الله

هدانا الله و هداك إلى ما فيه خير لديننا و معاشنا و عاقبة أوامرنا

 
At 6:40 PM, Blogger sahar said...

لو انت نفسك بصيت حواليك بموضوعية هاتلاقي ليلي كتير اوي انا لما فكرت في الموضوع لقيت ان ليلي في كل مكان للاسف طب اعقلها كدة

 
At 6:40 PM, Blogger عبدالله مفتاح said...

شيماء: نظرة الندية والتحدي كفيله بانها تهدم اي بيت ناجح

بنت مصرية : فرحة نوال سعداوي بالزرع اللي زرعته والحصاد اللي بتحصده زي ما بنقرا لاميرة حسن في الدستور ادي المدونات كمان بيتكلموا بنفس الصيغه (افتراض ان الرجل سيء الطباع حاد العشرة خائن وعديم القيم)
اللي يقرا المدونات يحس ان الراجل تلخصت مهمته في قهر المراه وسجنها الفكرة اللي بتضمنها كل كتابات ذات الاسم الكريه
وطبعا على طول قلتي الشعراوي يؤخذ ويرد منه لان راي الشعراوي مش هيعجبكم في الموضوع ده وهو ده اللي انا قلته التحايل على الدين البحث عن راي من اي شيخ ايا كان لتبرير تصرفاتنا

ابيتاف : مش فاهم انتي تقصضدي ايه ؟ هي حقوق المراه تتلص في التخلي عن الحشمة والذهاب الى الينما والعوده بعد العاشرة

عرب: دورلي كده في كل ثقافتنا العربية على مرادف لكلمه ذكوري

بلو روز:: المشكله ان انكم كتبتوا عن نماذج موجودة بس بردو انا ممكن اقلكم نموذج عن الست اللي سرقت جوزها وهربت بولاده والراجل اتجنن وافضل اقول آآآآآآآآىه من حقوق الرجل الستات قهرونا ظلمونا النموذج موجود اهو اهو في مجتمعنا لازم يا رجاله تشوفوا حل في الستات
اعتمادنا على الحالات الشاذه مش اسلوب علمي لتقييم موقف

زنجولا: اللي انا قصدته قلته وخلص ابعت اللي انا مستنيه متخافش:)

لمياء: محدش من البنات رد ليه كل الانبياء رجاله؟ ردي عليا؟ ليييييييييه؟

فريده : انا لفيت وقريت وكل اللي قريته بيدلو في نفس الدلو اللي بتدلوا فيه السيده الكريهة لا جديد
الاعتماد على الحالات الخاصه والشاذه في السيطرة على النفوس والهاب الحماس ضد الجنس الاخر الموضوع مش نديه الموضوع تكامل بين الرجل والمراه
هل الفتاة التي ستنظر الى زوجها على انها ند ستفلح ؟العلاقة مش ندية العلاقة تكامليه

ندى: انا عايز رد ليه الانبياء كلهم رجاله؟

رانيه:(عقد شراء إنســـــانة ) يا خبر يا رانيه؟؟؟ انتي راضيه عن اللي انتي كاتباه؟
ده كلام يتقال؟ الكلام اللي انتي قلتيه ده مش موجود ....بجد مش موجود وزي ما فيه رجالة بيقهروا المراة في نساء بيقهروا الرجل

يا جماعه انتوا كده بتشحنوا نفسكم ضد الراجل قلوبكم بتبقى متحفزة للمواجهة مش للمعايشه القائمة على المودة والرحمة

طيب هتناول كلام سوسة المفروسه كنموذج واناقشه بعقلانيه زي ما بلو روز وبنت مصرية عايزين
1- سوسة افترضت ان كل الرجال مش بيحبوا خلفة البنات مع اني بتمنى اني اخلف بنات بس واربيهم كويس واادخل بيهم الجنه ودي اول ماخذ على سوسه
2-لفتت النظر للبنات اللي اتربوا على سعاد حسني وكلامها وده اول حاجه سببت خلل عند البنت سعاد حسني ومشاهدها واحترام المجتمع ليها طيب اشمعنى هيه عيب وسعاد حسني نجمه
3-بشكل شخصي مش مقتنع تمام الافتناع ان البنت تمثل الا في حالات بسيطه وادوار معينه يعني سوسة معاها حق انها رفضت والمجتمع نظرته صح للي بيمثلوا في بنت تحب تبقى يسرا او ليلي علوي او حتى منه شلبي او منى زكي؟
4- مين قال الطب مش للبنات انا من اكتر الرجال اللي بيشجعوا مهنة الطب للبنات ومش لازم تبات برة البيت
5-نيجي للسفر والقعده في بلد غير اهلها اظن ان الكلام فيها سيطول لانكم يا بنات عارفين اغلب البنات اللي بيتغربوا وقصص المآسي اللي بتواجههم نتيجه الصدمه الثقافيه وغيره يعني من حق الاب يخاف على بنته
6 - طبعا عيب بنت تقعد مع رجاله لوحدهم طول اليوم لوحدهمفي المكتب ؟؟؟؟ ايه هو في حد معترض؟
7- في الدين سفر البنت بدون محرم جائز؟؟؟ حد يرد
طبعا سوسة اعتبرت ان ده غسيل مخ مع ان كل اللي قالت عليه معاها حق هي اتصرفت صح حد مختلف معايا؟
8- طبعا مفيش بنت اتربت على الدونية ولا حاجه الشعور ده من جواكم يا بنت والله انتوا اللي حاسين بكده...
9- (أي حاجه عايزة أعملها فيها شبهة ابداع او تفرد أواختلاف تبقى عيب و ما يصحش و مش من حقي ) الجمله دي بجد مش فاهم معناها
الشعور ده انتوا حاسين بيه لكن هو مش حقيقي حد قال حاجه لما نهى الزيني زلزلت البلد بشهادتها مهي ابدعت وكله سقفلها
ولا ايه هو نوع الابداع اللي تقصده سوسه؟
10-(سا عتها المجتمع كله كمان هيثق فينا و يفتحلنا كل الطرق ..من غير أي إشارات حمرا)
الاشارات الحمرة دي مش المجتمع اللي حاططها الدين والدين والدين

على فكرة يا جماعه انا يمكن مكنش متقبل بشكل كامل ان مراتي تشتغل او بنتي تغترب بس لو حصل وقلت لا للعمل اولا للاغتراب مش هيكون بقصد القهر ابدا ده تغيير للمصطلح ده خوف ...مسؤوليه
انا لما بشوف راجل بيتبهدل مش بيصعب عليا خالص
لكن اني اشوف واحده بتتبهدل فده بيهدني فعلا بيدايقني من اعماقي لاني دايما حاسس ان الانثى مش للبهدله
في الاخر عايز اقول ان محدش فيكم جاب سيرة البنات الملط اللي في الشارع اللي ماشيين اللي خلوا الشباب اعصابهم تبوظ بكل المعاني مش دول قنابل موقوته تستاهل النقد
محدش جاب سيرة الراجل اللي بيتذل عشان يصرف على مراته ولا انه يشوف في عينها نظرة هم ناتج عن مدايقات العمل
محدش جاب سيرة الستات اللي سعادتهم في التنكيد على ازواجهم وكل همهم طلب المال لغاية لما الراجل ينهب يدخل السجن تروح واخده العيال وتسيبه وتقله انت رد سجون وتخلعه
مش دي نماذج موجوده ولا هو الراجل السيء بس هو اللي موجود؟
بصوا للموضوع بحياديه ومحدش يفتك اننا في سجال كلنا اخوات فاهمين يا جماعه فاهمين؟
احنا اخوات..... احنا اخوااااااااااااات
محدش هيدخل بينا ويبوظ العلاقه بين الراجل والمراه
خلو العلاقه تكامليه
تعالوا نتكلم عن الاحسان بين الزوجين احسن لما كل واحد فينا يعدد للتاني صور قهر الجنس الاخر للجنس المنتمي ليه
تعالوا نصور الحياة الزوجيه بشكل حلو مش بشكل سجال
تعالوا نغرس في البنت والولد مفاهيم الخياء والعفه والصدق
مش دي اولى من اننا نقول احنا مقهورين وانتو تقولوا احنا اللي مقهورين
يارب يا اخواتي كلكم تكوني فهمتوني احنا اخواااااااات ومش اي حاجه غير اخوات
صلى الله عليك يا حبيبي يا رسول الله

 
At 8:37 PM, Blogger nirfana said...

صباح الخير اولا

ثانيا لما المهاجمه بالتسرع وذكر مفكرات عربيات ثوريات حتى وان كان لهن بعض الشطحات التى لا تؤخذ عليهن برغم ذلك


احمد
راجع كل المدونات وفاضل بيهم
ستجد نقطه تلاقى واحدة

تصرخ من خلالها كل الليلاءات

اظنك تعرفها جيدا
اليس من حقنا ان نشعر بانسانية اكثر من ذلك



تحياتى

نيرفانا

 
At 4:31 AM, Blogger farida said...

أحب تزورني يا عبد الله كتبت بوست عن موضوع الشغل و بهدلة الستات

و بالنسبه لنكد النسوان والله انا كتبت في بوستات
sex and city
قد ايه في ستات بتغلط في حق أزواجها

المه إيه بقى سعاد حسني اللي بوظت البنات

مش ممكن تكون نظريتك لكل كلامنا بالسطحيه دي

إحنا فعلا متكاملين
و علشان كده لازم تسمع وجهة نظر الأخر و تعترف لو فيها حتى جزء من الصحه
http://morning-cafe.blogspot.com/2006/09/blog-post_10.html

 
At 4:55 AM, Blogger رانية said...

يا أخ عبد الفتاح واضح ان انت مش بتفتح المدونات كويس
مش أنا اللى كتبت عقد شراء انسانة
تقدر تضغط على اسمى و هو يدخلك على مدونتى على طول

أما الموضوع اللى حبيت انك تبص عليه فى مدونة "حلم " فهو الموضوع الثانى بعنوان كلنا ليلى ..آه يا ليلى

للمرة الثانية أدعوك فى التروى حتى فى البحث عن عناوين المدونات !!!!!

و هدانا الله جميعا

 
At 5:09 AM, Blogger أحمد المصري said...

حقولها على طول وحفضل أقولها لحد ماموووووووت مفيش حاجة اسمها المساواة بين الرجل والمرأة لأن المرأة أعلى مكانة وأشرف منزلة 00لاأحقر من قدر الرجل لأن له مكانة عالية ومهمات عظيمة هناك مشاكل للمرأةو يجب حلها لا أن يتم شجبها بمجرد ذكرها ..ايوه فيه علمانيين يحرقو الدم يخلو البنت تقلع حجابها وترقص ليلة الفرح بحجة إنها ليلة العمر كأن ربنا خلق اليلة دي عشان نعصيه مشاكل المرأة لازم تتحل لازم نبطل استبداد ضدها استبدادنا ضدها حيخلي فيه ميت نوال سعداوي ياعم عبد الله

 
At 5:45 AM, Blogger عبدالله مفتاح said...

نيرفانا : يعني انتي بتسميهم مفكرات بس انا مش بعتبرهم مفكرات لان اغلب كلامهم شطحات


فريدة: انا كتبت ردي على البوست عندك في المدونة بس اسلوب التفكير ده مينفعش معاه اننا نفكر اننا متكاملين لانه خلاص بيعمل حزب الرجال القاهر وحزب المراة المغلوب على امره
اياكان كلام البوست اللي انتي كاتباه هايل بس انتي فاكرة ان البنات اللي كتبوا هو ده قصدهم؟ ولا الحقيقه هتضيع في النص والسلبي والايجابي هيختلطوا مع بعض

رانيه : انا دخلت المدونة بتاعتك وقريت كلامك اظن ان كلامك معقول.
بس بردو مفيش عندنا احصائيه عشان نعرف كام راجل بيستشير مراته كله اعتمادنا على الشعور يعني حاسين ان الراجل مهمش دور مراته
على العموم لو الفتاة ترضى بان الدين يبقى الحكم بينها وبين الرجل يبقى كلنا متفقين
بس من غير تحايل
(يعني سفر البنت في الدين من غير محرم حرام البنات اللي هنا هتعتبر الاب اللي يمنعها من السفر برة مصر اب بيقهرها)

احمد المصري: يا عم استبداد ايه بس فين الاستبداد . قلنا الاستبداد متبادل بعض الرجال وبعض النساء

انا عايز اقفل الموضوع ده وبدل منعمل حملة كلنا ليلى
تعالوا نعمل حملة قيام الليل نتفق كلنا على يوم ونقوم فيه الليل
مش كده يبقى احسن؟

 
At 6:44 AM, Blogger أروى الطويل said...

ربنا مخلاش ستات انبيا لان الست ضعيفة نفسيا وجسديا وما تقدرش تستحمل الرجاله هم اقدر على حمل رسالة عظيمة كده
وبعدين يا استاذ عبد الله بشويش شوية عليهم يمكن هما حاسين بكده فعلا
والاختلاف لايفسد للود قضيه

 
At 7:55 AM, Blogger bluerose said...

http://bluerose.egyblogs.com/?p=75

دا ردي على حضرتك
في انتظار ردك هناك , لأن حضرتك هنا بتعمم على كل تدوينات الحملة

انا عايزة رد محدد على كلامي مش رد على كل المدونات

 
At 1:54 PM, Blogger sha3'af said...

نوال السعداوي ، زي أميرة حسن اللي بتكتب في الدستور ، و أدي كمان المداونات ( أكتر من خمسين مداونة ) ، و سيادتك بتقول ان كله واحد ، و زرع و حصاد و حاجات غريبة كده!!!!!!!!!!

نفس الجمل ... نفس التعبيرات ... نفس الأسلوب

حد قال لسيادتك انها بتدي دروس خصوصية و احنا بنروح ناخد عندها و لا حاجة؟؟؟؟؟

الغريبة فعلا ان المداونات كلهاتقريبا الشيء المشترك ما بينها هوه لوجو " كلنا ليلى " و بس
و على الرغم ان كتير منا ما يعرفوش التانيين ، و دي أول مرة يتم التعارف ما بينا من خلال " كلنا ليلى " ، إلا ان سيادتك بكل بساطة أطلقت تعميمات غريبة لحد قرا مداونة ولا اتنين ، بعدين كل ما يدخل حتة يلاقي فيها نفس اللوجو ، يقوم صادر حكمه المعمم مرة واحده كده

دي نقطة

النقطة التانية
ان أصلا حضرتك لو دخلت ع المداونة الأم هتلاقي ان مش من أهداف الحملة مطلقا - لاحظ النفي من فضلك - أي اعتراض ضد أي مبدأ من مباديء الدين ، مهما يكن
يعني مقارنة مالهاش موقع م الاعراب مع نوال السعداوي

و زي ما هو موجود في المداونة الأم / ده لينكها
http://laila-eg.blogspot.com
الغرض منها مش
(افتراض ان الرجل سيء الطباع حاد العشرة خائن وعديم القيم)
زي ما سيادتك قلت
و لا اننا نقول النساء ملايكة و الرجالة لا
و لا طبعا مناقشة المساواه في مهام الرجل و مهام الست - زي ما قلت - ببساطة عاوزين مساواة في معاملة انسانية كريمة
ده كتير؟
و لاحظ ان كل واحدة م اللي اتكلموا عبرت عن هم شخصي بالنسبة لها سواء في بيتها أو في مجتمعها ككل

و لاحظ كمان ان " الرجال " اللي سيادتك بتتكلم عنهم دول أصلا عادوا نادرين لدرجة مفزعة
يعني كتير منهم لا عاد ليهم قوامة و لا عادوا متحملين مسؤلية أصلا
احنا ما نكرهش نلاقي راجل بمعنى الكلمة
غيور على بيته و دينه و أهله
متحمل مسؤليتهم صح
قادر يحميهم حماية الرجل لأهله ، مش حماية السجان للمسجونين

و على فكرة احنا مش بنتكلم عن الراجل و قهره
احنا بنتكلم عن مجتمع كامل بقيت دي طبيعته - انكر بقى انكر اننا عايشين حالة من القهر في كل مكان و على كافة المستويات حتى لو بتخلص ورقة تافهه في اي مصلحة -

بعدين سيادتك اتهمت البنية تهمه خطيرة " التحايل على الدين !!!" ، حضرتك ابقى استخدم نص من الكتاب أو السنة و اكتب كل أراء الفقهاء اللي اتكلموا عن النقطة محل الخلاف و اتكلم بطريقة موضوعية بعدين ابقى انطق بالجملة دي

و على ما يبدو أصلا ان سيادتك مكون رأي مسبق عن كل الكتابات
لدرجة ان سيادتك حوّرت ما قالته ايبيتاف ردا عليك ، و واضح انك ما قريتش الكلام صح و لا فهمته زي ما اتقال و بالتالي بترد على حاجة مالهاش وجود أصلا
لأن ابيتاف قالت لما واحدة متحجبة و لاّ محتشمة ( وكررتها في النهاية بانها محافظة على نفسها)
يعني ما جابتش سيرة عري سيادتك

( و لا تتأخر للساعة عشرة )
زي ما قالت
مش بعد عشرة سيادتك

و زي ما قلنا ، كل واحدة فينا بتتكلم عن الجزء اللي شايفاه م الموضوع ، يعني مش بنتكلم عن حقوق المرأة و الكلام الكبير ده ، بقدر ما بنتكلم عن هموم شخصية شفناها أو عشناها أو اتألمنا لوجودها في نمازج " واقعية " قريبة مننا بشكل أو بآخر
يعني مش كلام في الهوا سيادتك

كمان حضرتك مسكت في نقطة " كل الأنبياء رجالة ليه " يعني سيادتك اللي محور انتباهك مين أفضل من مين مش احنا
سيادتك بتفترض نقطة مناقشه ماحدش طرحها أصلا منا ، و باني عليها كلامك

الرجال على عينا و على راسنا من فوق ، بشرط يكونوا قد رجولتهم
رجولة المعنى و الأخلاق و النبل و الشهامة
مش رجولة التكوين الجسدي

و " عقد شراء انسانة " اللي مش عاجب سيادتك ده
موجود و نص و تلت تربع
بس كون سيادتك ماشفتش مثال لده
فصراحة تبقى مثال نادر

و على فكرة كتيييييييير م الشباب و الرجال يدركون ما قيل في التدوينة

و دي مشكلة مجتمع
البنت فعلا دلوقتي أهلها مش بيدوروا غير على مين معاه فلوس أكتر
مين يقدر يجيب شقة أكبر
مين هايدفع مهر أكتر

و المصيبة ، ان فيه تفكير دلوقتي بقى شبه منتشر ، ان كل ما البنت تعليمها يزيد ، مهرها يزيد

و مهر المدرسة غير مهر الدكتورة غير مهر اللي قاعدة في البيت

يعني فعلا قوانين بيع و شرا هيه اللي بقت سايده المجتمع
مش عارفه سيادتك مش عايش في نفس مجتمعنا ده و لا ايه؟


و حضرتك قعدت تقول نماذج فردية و كل واحده بتكتب عن حالة خاصة - مع ان ده حقنا تماما - بعدين لما جيت ترد على سوسة المفروسة رديت بحالة خاصة برضة و هيه سيادتك ، يعني لا عملت استقصاء و لا رديت بأسلوب علمي و لا أي شيء م الحاجات اللي كنت عمال توعظ بيها


ثم سيادتك احنا مش عندنا " كلنا الخمسين؟" جنون ارتياب و لا مرض عقلي عشان " يتهيألنا " اننا اتربينا على كده
و الشعور اللي جوانا ده مش هايجي م الباب للطق ، مش صحينا لاقينا نفسنا " الخمسين؟" " اللي ما يعرفوش بعض؟" حاسين بكده
ده موقف ورا موقف و أزمة ورا أزمة ربوا احساس بالخوف جوانا


و بالنسبة لنقطة الابداع دي ، فأبسط كلمة بتتقال لما يلاقوا الورقة و القلم " ابداع منزلي لا يشكل أي خطر من أي نوع ، و لا أي تجاوز " ..."تضييع وقت " ... " كلام فارغ" ... "فاكرة نفسك حاجة" ...قومي شوفي لك حاجة تعمليها في المطبخ أحسن

الخ ، الخ

لو حضرتك ما بتشوفش ده و لا تسمعه ، فحضرتك مثال نادر مش موجود


و فعلا الأنثى تصعب ع الواحد لأنها مش للبهدلة
بس صدقني يا أخي
البهدلة اللي بتشوفها "الأنثى " - و لاحظ استخدامك للفظ يا من اعترضت على كلمة " ذكوري" - جوه البيت ساعات بتبقى أكتر ألف مرة من بره البيت
( أنا شخصيا بأتكلم عن حاجات بأشوفها كتير )

و هاقول تاني: ده رد على قهر المجتمع كله ، مش شرط قهر الرجل للمرأة و بس
و لاحظ يا أخي ان توضيح جوانب المشكلة و عرضها زي ما هيه هي أول خطوات الحل

و أتمنى ... أتمنى ... أن تقرأ ما كتبتُهُ كما قلتُه ، و ليس كما تتوهم أو ترد عليه كما تُحرف

 
At 2:17 PM, Blogger ay_ebr said...

This comment has been removed by a blog administrator.

 
At 2:49 PM, Blogger ay_ebr said...

كل يدعي وصلاً لليلي وليلي لا تقر لهم وصلاً بذلك
اقول ذلك الي كل من ظلم المراة او ساعد واعان علي ذلك والي اولئك الذين ارادواللمرأة ان تخرج عن هويتها وتفقد قيمتها.
يغالطونك اذ يقولون ان المجتمع انصف الرجل عن المرأة وأ فرد له مساحة من الحرية علي حساب المرأة بل ان المجتمع اساء الي الجنسبن الذكر والانثي واضر بهما ايما الضرر حينما تخلي عن هويته وسمته ولجأ الي العادات والتقاليد بل استعان بثقافات دخيله اودت بكيانه فاصبح جسدا هامدا يفتقد الحياه.
واذا اردنا ان الحياة السعيده فعلينا ان نعيد النظر في فهمنا لدورنا في الحياة ونعرف جيدا ما هو المطلوب منا حتي ناتي منه قدر ما نستطيع
وان كنا نجهل مهمتنا في عالمنا فلنسمع اذا............ً.

 
At 6:56 PM, Blogger عبدالله مفتاح said...

اروى الطويل: مش عارف انا حاسس ان اسلوبي حاد شوية بس انا مقصدش انه يكون حاد
على رايك يمكن هما حاسين بكده؟ انتي مش حاسة انك مقهورة؟

شغف: بلاش تقولي الرجاله اصبحوا نادرين لان الرد الطبيعي هيكون وفين البنت الملتزمة ما البنات في الجامعه قدامنا مهازل متحركة
ايوة طبعا انفى انكم متعرضين لقهر في كل مكان
يا سيدتي الفاضله انا اول اسبوع ليا في الشغل كنت بدور على اللي شغالين معايا عشان الاقي حد يفهمني حاجه في حين ان البنت اللي اشتغلت معايا في نفس التوقيت لو احتاجت حاجه يتلم عليها خمسة سته ومتقمش من مكانها

انا فعلا فهمت كلام ابيتاف غلط ... بعتذر ....

ابيتااااف بعتذر انا فهمت كلامك غلط انا عرضت كلام سوسة وفندته هيه عايزة - مع كامل احترامي وتوقيري وتقديري ليها- انها المفروض كانت مثلت في فريق التمثيل وباتت برة البيت لانها دكتورة وده شغلها وكانت قبلت عقد العمل وسافرت لوحدها برة او اشتغلت في شركة ادويه وقعدت مع راجل في مكتب طول النهار لوحدهم
واعتبرت ان ده غسيل مخ مش تربية صح
تاني ( عقد شراء انسانه ) ابحثوا الله يخليكم في ثقافتنا العربية عن المعنى ده مش هتلاقوه خااااااااالص انا لا انكر في من الخليج ناس بيعملوا حاجات زي كده وانا طبعا برفضها بس زواج مش عقد شراء بردو بلاش ترخصوا البنت سموه زواج متعه بس مش عقد شراء

اي ابر(مش عارف هي كده): كلامك جميل بس يا ريت كنت شرحت اكتر عشان نفهم قصدك كامل

تقبلوا تحياتي

 
At 1:46 AM, Blogger Geronimo said...

على رأي بتوع التليفونات ادفع وبعدين اعترض ... كنت اقرا وبعدين اعترض ولا هما كلمتين الرجالة حافظينهم وكل ما واحدة تيجي تفتح بوقها تكتموهم بيها
النساء اول من يدخلون النار
الانبياء كلهم رجالة
ناقصات عقل ودين
فتش عن المرأة
الرجال قوامون على النساء
ما تكمل الجمل وتفهم المعاني
على فكرة انا مقريتكش وحكمت زي ما انت ماقريتش كل ليلى وحكمت
وعاملتك بنفس نظامك
نظام اللكلكة

 
At 4:24 AM, Blogger أحمد المصري said...

بالنسبة لأنه فيه استبداد فيه استبداد من الأب ولأم ولأخ وغيره أما عن اتفاقنا على يوم نقوم فيه الليل فكرة كويسة ولو إنه لازم نقوم الليل كل يوم لكن ليس من المسلمين من لم يهتم بأمرهم وأعتقد انه لازم برضه نناقسش مشكلات المرأة الصلاة مش كل حاجة -هي مهمة جدا طبعا-لكن من العبادة إن احنانحل مشكلات المجتمع0

 
At 10:23 AM, Blogger ألِف said...

بما أنك من المدققين في استخدامات الكلمات و معانيها، هلا تفضلت و شرحت لنا وجه الشبه بين الكلمات التالية التي عطفتها جميعا: "المدلسين والعلمانيين والملاحده"!

 
At 12:27 PM, Blogger soosa el-mafroosa said...

أولا يا عبدالله انا مقدرة الخضه اللي انت فيها..معظم الرجاله اللي بيشوفوا ستلت أو بنات متجمعين على حاجه بيتخضوا زيك كده و اول حاجخ بتيجي في ذهنهم ان الستات دول اكيد هيبوظوا الدنيا و لو فتحنالهم الباب شوية..هينحرفوا كلهم ..لأنهم خلقوا من ضلع أعوج

يا أخ عبد الله ده جزء من عدم ثقة المجتمع بالبنت..لو خدت شوية حرية هتجيبلنا الفضايح.. وده كله عشان فيه بنات غير ملتزمات بتشوفوهم قدامكوا و بتخافوا كل البنات يتحولوا زيهم..لكن انتوا بتنسوا ان فيه رجاله كتير منحرفه..و برضه فيه رجاله محترمه ..وفي أي مجتمع فيه الصنفين من الجنسين...يعني مش الستات بس اللي مكتوب عليهم الإنحراف

ثانيا موضوعي اللي انت خدته مثال على ان كلامك صح و على اننا كلنا واخدين موقف نوال السعداوي

اتق الله يا أخ عبدالله ..و اقرا و افهم الكلام كويس قبل ما تتسرع و تحطني في سلة واحده مع هذه المرأه التي لا أكن لها أي إحترام

موضوع التمثيل ...كنت في إعدادي و مدرسة بنات بس و معظم المسرحيات كانت دينية أو تارخية ..يعني ما فيش مبرر اني أرفض غير عدم ثقتي بنفسي نتيجة غسيل المخ اني مش من حقي أعمل حاجه غير اني أبقى زي بقية البنات و ماعملش حاجه غير المذاكرة و شغل البيت و بس

موضوع النباتشيات في الطب ..تقدر تقوللي لو أختك أو والدتك تعبت باليل و راحت مستشفى و كنت من الناس اللي مابيحبوش ستاتهم ينكشفوا على دكاترة رجاله..تسمح تقوللي لو مافيش دكتورة سهرانه في نباتشية تعمل ايه؟

موضوع الدراسة خارج المحافظة...مش فيه حاجه اسمها مدينة جامعية يا أخ عبدالله و الا عندك اعتراض على انها كمان ضد الدين؟...أنا ايامها ما حاولتش أفكر فيها لأن غسيل المخ كان يقوم على ان البنت لو حطت رجلها خارج بيتها حتى لو في مدينة جامعيه تبقى منحرفه

موضوع الرحاله اللي مابتحبش خلفة البنات ..حد قاللك اني عملت احصائية و قلت ان 100% من الرجاله مابتحبهمش ..أكيد يعني فيه للقاعده شواذ ..يؤكدها و لا ينفيها

اتمنى اني اكون وضحت وجهة نظري في بعض المواضيع و بينتلك اني ماباطالبش بثورة ضد الدين ..لاقدر الله

اسألني طيب قبل ما تتهمني الإتهامات دي...يتهيألي حقي عليك ..كأخت من أخواتك ..أنك تناقشني في مدونتي و تفهمني الأول قبل ما تيجي هنا و تكتب نقد عن البوست بتاعي من غير ما أعرف

عموما ..شكرا ليك

 
At 9:06 PM, Blogger 3rby said...

انا عندي اقتراح احسن...ماتيجي نولع في الستات كلهم ونرتاح ونريح...ولا اقولك ....احنا ننزل سيتي ستارز نولع في البنات اللي مش عاجبك لبسهم...كان ممكن تكتب رايك وتعلق...بس ماحصلتش انك تشبههم بعلمانيين وملحدين علشان بيتناقشوا

 
At 3:41 AM, Blogger حاول تفتكرنى said...

عبد الله

متخفش على بناتنا من نوال السعداوى
فحواء نفسها - قرفانه من أفكارها


فى مرة استضافتها هالة سرحان ، وطبعا هالة سرحان مش نموذج نحب ان نرى عليه بناتنا وزوجاتنا ولا هن أنفسن يحببن ان يكن مثلها

ومع ذلك رأيت هالة سرحان فى قمة - عصبيتها من افكار العجوز تلك وعلى النقيض معها تمام خاصة فيما يختص بلقب الام لمخالفتها للآية الكريمة ( أدعوهم لأبآئهم هو أقسط عن الله )

صدقنى نموذج السعداوى لا يلقى رواجا لدى حواء لآنه ضد الطبيعة والفطرة


تحياتى

 
At 2:30 AM, Blogger bolbol hayran said...

الله يكون في عونك يا عبود .. عارفك مبقوق من البنات كلهم زينا

اسمح لي بتعليق على أخونا العربي اللي علّق

يا حاج عربي

صراحة أنا أؤيدك .. مرة وإحنا في محاضرة الفسيولوجي قررت أنا وواحد صاحبي نعمل كده

بس طبعاً لازم تبعد عن ماما وخالاتي وعمتي وأخواتي وبنات أعمامي وعمتي وبنت خالتي وخيلاني وبنات عم أبويا وبناتهم وجاراتهم في الحارة .. ولو فضل حد ابقى ولّع فيه

 
At 6:47 PM, Blogger عبدالله مفتاح said...

جورينميو : انا معتمدش على الكلكله خالص انا اديت مثال على كلاكمك وعقلت عليه وهو كلام سوة المفروسه

سوسة المفروسة انا مخضوض عليكم مش اكتر

عربي : انا مشبهتهمش بحد انا بقول ان كلامهم قريب من كلامهم

حاول تفتكرني : منور المدونة بس مش شرط نوال بشكل متطابق ممكن قريب ن فكرها

بلبل: مش مبقوق ولا حاجه بس التفكير الصحي حلو

 
At 3:09 PM, Blogger 3rby said...

محدش هايتبقي...بس انا كان قصدي اقول كلنا بشر...ومابحبش الناس اللي عايشة في دور الاه وتقعد تحكم مين صح ومين غلط...انا كان نفسي يعبر عن رايه بطريقة احسن ماتوحيش بالكره...تبين ان فيه اختلاف موضوعي...مش اكتر

 
At 1:07 PM, Blogger aMiR-El ZaLaM said...

سلام عليكم...


دلوقتى الست ليلى بتطالب إن الراجل يعامل الست بطريقه كويسه..


طب ماشى مش معنى إننا شوفنا حاله " شاذه" فيها معامله وحشه للست يبقى كل الشباب كدا...

ماهو فى ملايين من الستات وفيهم أمى وأم فلان وأم علان عايشه حياتها بطريقه هاديه وسعيده وكويسه...

أنا مش شايف أى سبب للضجة دى والله العظيم...

مُجرد إثبات موضوع مش موجود أساساً

وهو إن الست بتتعامل بوحشيه وبعنف..

هو إحنا عايشين فى سجن أبو غريب والستات أسرى ولا إيه!!

فى إيه بس ياستى إنتى وهى؟؟

مالكم عايزين إيه؟ !!

سُبحان الله محدش عاجبه حاجه..

يعنى أيام سى السيد كانت الست زى الـ (....) ومش بتتكلم...

ولما إدناها حريه بتتكلم وعايزه تقلب الدُنيا وتقلب المجتمع رأساً على عقب..

فى حاجات مينفعش تعملوهاااااااااااااا

مينفعش خالص...

مستحيل..

إنتو مش بتتعاملوا بوحشيه ولا حاجه..


مش معنى إن والدك ضربك مره يبقى بتتعاملى بوحشيه..

ده من مُنطلق إنه بيخاف عليكى لا أكثر ولا أقل !!

ده الموضوع كبير كبير أوى وكل واحده عايزه توصل باقى البنات انها بتتعامل بوحشيه وقلة قيمه و...و...و....

طب فهمونا يعنى عايزين تتعاملو إزاى؟؟

على الطريقه الأوروبيه...

" اللى وديتنا فى ستين ألف داهيه "


طيب حادر بعد ماتتنفذ مطالبكم ياترى هتخترعو إيه جديد !!

ربنا يستر...

 

Post a Comment

<< Home